Pas disa vitesh si Drejtuese e Qendrës ASA dhe njëkohësisht terapiste zhvillimi për fëmijë me çrregullime të ndryshme zhvillimore, e ndjeva të domosdoshme themelimin e një shoqate të mirëfilltë. Kjo nismë lindi si përgjigje ndaj realitetit të vështirë që përballojnë shumë familje shqiptare, të cilat, për shkak të kushteve ekonomike, nuk mund të përballojnë kostot e terapisë për fëmijët e tyre. Gjatë punës sime, kam njohur prindër që çdo ditë përballen me sfida të shumta – që nga pamundësia për të ndjekur terapi profesionale, deri tek mospërfshirja e fëmijëve të tyre në kopsht apo komunitet. Shpeshherë më ndanin me dhimbje historitë e tyre, dyert që iu janë mbyllur, dhe ndjesinë e vetmisë përballë një sfide kaq të madhe. Ishte pikërisht ky realitet që më shtyu të ndërmarr një hap më të madh: të krijoj një strukturë që jo vetëm ofron terapi, por që bëhet zë për këta fëmijë dhe mbështetje për familjet e tyre. Autizmi nuk ndikon vetëm te fëmija — ai prek të gjithë familjen dhe komunitetin përreth. Është një rrugëtim i vështirë që kërkon mbështetje të vazhdueshme, përfshirje sociale dhe mirëkuptim të thellë.

Autism Society of Albania ka si mision të krijojë një qendër gjithëpërfshirëse: 

– Që ofron terapi profesionale për fëmijët; 

– Që trajnon prindërit për të ndjekur dhe mbështetur zhvillimin e fëmijëve në mënyrë të vazhdueshme; 

– Që ndërton ura bashkëpunimi dhe ndjeshmëri në komunitet. Ne besojmë se vetëm nëse punohet në të gjitha këto drejtime njëkohësisht, efekti i terapisë mund të jetë i thellë dhe afatgjatë.